СМІ ў Беларусі

У ліпені – кастрычніку 2018 г. сітуацыя ў галіне СМІ ў Беларусі заставалася напружанай, нягледзячы на той дыялог, што вядзецца паміж Беларуссю, Еўразвязам і ЗША, у тым ліку па пытаннях правоў чалавека. Працягваўся адміністрацыйны пераслед журналістаў-фрылансераў за супрацоўніцтва з замежнымі СМІ без акрэдытацыі. Колькасць і агульная сума штрафаў беларускім журналістам на падставе ч. 2 арт. 22.9 Кодэкса аб адміністрацыйных правапарушэннях («незаконны выраб і/ці распаўсюд прадукцыі СМІ») ужо ў жніўні 2018 г. дасягнулі паказчыкаў за ўвесь папярэдні год (які да гэтага быў “рэкордным”). Калі за 2017 год суды штрафавалі журналістаў-фрылансераў па ч. 2 арт. 22.9 КоАП 69 разоў, то ў канцы кастрычніка 2018 г. колькасць штрафаў журналістам па гэтым артыкуле перавысіла 90, а агульная сума склала больш за 80 тыс. беларускіх рублёў (каля 33 тыс. еўра).