Весткі й Паведамленьні

6 жніўня 2017 году, спаўняецца 500 год з часу выхаду першай кнігі, выдрукаванай беларускім асьветнікам і гуманістам Францішкам Скарынам. Гэта значная і слаўная дата, і яна мусіць быць годна і шырака адзначаная беларусамі па ўсім сьвеце. Выхад Псалтыра ў Скарынавым перакладзе, у беларускай рэдакцыі стараславянскай мовы, вывеў беларусаў наперад сярод усіх народаў Усходняй Эўропы. Набліжэньне Сьвятога Пісьма да звычайнага шэраговага верніка, выклад Слова Божага ў зразумелай простаму люду мове – гэта было інфармацыйнай і сацыяльнай рэвалюцыяй, аналягам якой, у сэнсе кнігадрукарскім, можа быць кампутэрная рэвалюцыя канца 20 ст.