Адна між замкаў

Кніга прысвечаная жыццю і творчасці пісьменніцы Вольгі Іпатавай, ганаровага акадэміка Міжнароднай акадэміі навук «Еўразія», кавалера ордэна «Знак Пашаны» і медаля Ф. Скарыны, лаўрэата многіх літаратурных прэмій, актыўнай грамадскай дзяячкі. Вольга Іпатава — першаадкрывальніца не толькі новых тэмаў і пластоў нашай гістарычнай спадчыны, але і глыбінных плыняў нацыянальнай культуры, такіх, як індаеўрапейская, зараастрыйская, фракійская, якія арганічна ўплеценыя ў вобразы герояў, што сталі значным здабыткам беларускай гістарычнай літаратуры. Славянскія абліччы вялікіх князёў літоўскіх, адкрытыя ёю для шырокага чытача ў трылогіі «Гаспадары Вялікага Княства», унікальнай у нашай літаратуры, маюць вялікае значэнне для самаідэнтыфікацыі народа, чые жыццё склалася на скрыжаванні шляхоў многіх еўрапейскіх нацый.