Свабода да апошняга дыхання

Гэтая кніга нарадзілася ў выніку вандровак па Беларусі ў 2005-2006 гг. вядомай пісьменніцы Вольгі Іпатавай, пад час якіх яна, пры падтрымцы Інстытута гуманітарных і экалагічных тэхналогій, наведала дзесяткі памятных знакаў, магіл і помнікаў славутым людзям нашай краіны, якія былі змагарамі і набліжалі да нас Свабоду. Апрача таго, некалькі артыкулаў прысвечаны нашым землякам, пахаваным ў іншых краінах — Амерыцы. Канадзе, Нямеччыне, — В. Жуку-Грышкевічу, Я. Сурвіллу, А. Грыцуку. Асобны раздзел склалі згадкі пра беларусаў Вільні — Зоську Верас, Антона Шантыра, Лявона Луцксвіча і іншых, з якімі пісьменніца неаднойчы сустракалася і расказвала пра іх у тэлевізійных перадачах на Гродзенскай студыі тэлебачання, дзе яна працавала рэдактарам ў 1970-1973 гг. Асобныя матэрыялы гэтай кнігі друкаваліся ў газетах «Наша слова», «Новы час» і «Краязнаўчай газеце».