Кніганоша

– Шаноўны Сяргей Аляксандравіч, Вы з’яўляецеся ўкладальнікам Гродзенскага літаратурнага альманаха «Новы замак». Нядаўна выйшаў трэці выпуск яго. Распавядзіце, калі ласка, што чакае чытачоў у новым нумары і чым ён адметны? – Мне здаецца, нумар даволі цікавы. Ёсць новая рубрыка «Civitat Grodnensis», дзе тэксты пра Гродна. Надрукаваныя ўспаміны пра Васіля Быкава аўтарства Ігара Жука і Аляксея Пяткевіча. Яўген Петрашэвіч напісаў «Баладу пра Грунвальд» у незвычайным фальклорным стылі. Ала Петрушкевіч працягнула свае «Шчонаўскія абразкі» – пра аднавяскоўцаў, таксама апублікавала цікавыя ўспаміны пра паэта Юрыя Гуменюка.