Кітай - Сібір - Масква

Язэп Германовіч (літаратурны псеўданім — Вінцук Адважны) нарадзіўся ў 1890 годзе ў Гальшанах. Каталіцкі святар, пісьменнік, паэт і публіцыст. У 1932 г. быў накіраваны на місіянерскую працу ў Харбіне (Кітай) , дзе таксама быў дырэктарам гімназіі. У 1948 г. быў арыштаваны кітайскай паліцыяй і перададзены савецкім органам бяспекі. Быў прысуджаны да 25 гадоў прымусовых работ у лагерах. Знаходзіўся ў зняволенні ў Сібіры. Вызвалены пасля смерці Сталіна. Пра сваё знаходжанне ў лагерах напісаў успаміны «Кітай - Сібір - Масква», што былі апублікаваныя на беларускай, італьянскай, польскай і літоўскай мовах. Язэп Германовіч памёр у 1978 годзе ў Лондане.