Права на волю

Пра сітуацыю ў Беларусі: 27 верасьня ў Жэневе на другой сесіі Рады правоў чалавека ААН сьпецыяльны дакладчык па Беларусі Адрыян Севярын прадставіў справаздачу аб беларускай сітуацыі. Ён адзначыў, што “за апошнія два гады становішча ў галіне правоў чалавека ў Беларусі няўхільна пагаршаецца”. Сёлетнія падзеі, на думку дакладчыка, сьведчаць: “у Беларусі паранейшаму існуюць адыход ад плюралізму, адмова ад дыялогу, адмаўленьне грамадзянскіх правоў, падаўленьне палітычных свабодаў, а таксама перасьлед апазіцыі, журналістаў, праваабаронцаў з боку дзяржавы”. Адрыян Севярын згадаў, што быў прызначаны сьпецдакладчыкам ААН па Беларусі яшчэ ў 2004 годзе. Аднак беларускія афіцыйныя ўлады фактычна ігнаруюць яго — не дапускаюць у краіну, не адказваюць на запыты. Таму спадар Севярын папрасіў пашырыць ягоныя паўнамоцтвы ў рамках дзейнага мандату. Кіраўнік прадстаўніцтва Беларусі пры ААН і іншых міжнародных арганізацыях у Жэневе Сяргей Алейнік агучыў афіцыйную пазіцыю. Ён назваў пасаду сьпецдакладчыка па Беларусі “рэліктам атмасферы супрацьстаяньня і канфрантацыі, якая дзейнічала ў ранейшым Камітэце правоў чалавека ААН і не павінна быць у трансфармаванай структуры — Радзе ААН”.