Энэргетычная бясьпека краін Цэнтральнай Эўропы

Ідэя правядзеньня круглага стала, а адпаведна і яго вынік – гэты зборнік матэрыялаў, узьнікла як адказ на выклік, кінуты эканамічнай рэчаіснасьцю нашай краіне. Становішча Беларусі, як цэнтральна-эўрапэйскай дзяржавы, павінна быць абмеркавана ва ўсіх аспэктах: эканамічным, культурным і палітычным. Дадзеная праца пачалася з аспэкту эканамічнага і яго вельмі важнай складовай – энэргетычнай. Геапалітычны балянс у рэгіёне можа быць забясьпечаны толькі на падставе роўных правоў і магчымасьцяў краін-спажыўцоў, краін транзыту і краін-пастаўшчыкоў газу і нафты. Так склалася, што на геапалітычныя рэаліі накладаюцца палітычныя – старыя краіны Эўразьвязу не гатовы трактаваць на роўных сваіх новых чальцоў. Расея, як было заўсёды, выйграе на падзелах і спрэчках у Эўропе. Беларусь і Ўкраіна займаюць новую геапалітычную пазыцыю – у Цэнтральнай Эўропе.