Царкоўнае Слова

Сяла Крупчыцы амаль паўвека няма на карце Жабінкаўскага раёна Брэсцкай вобласці. Цяпер яно мае назву Чыжэўшчына. І толькі даўнейшыя карты і гістарычныя падзеі даносяць да нас некалі слаўную гісторыю гэтых мясцін. У 1883 годзе на прыход у Крупчыцах быў прызначаны айцец Ніканор Катовіч. Гэта была яго ідэя — новую царкву зрабіць храмам-помнікам воінам, якія загінулі ў бітве на крупчыцкім полі. Больш за 50 год служыў бацюшка ў храме, які сам адбудаваў. Некалі, яшчэ ў XVII стагоддзі, манахі каталіцкага ордэна кармелітаў аблюбавалі невялікае ўзвышша ля рэчкі Трасцяніца, што за 15 кіламетраў ад Кобрына і столькі ж ад Жабінкі. З дапамогай мясцовых памешчыкаў Асоўскага і Нестаровіча манахі пабудавалі з дрэва будынак манастыра, двухпавярховы, плошчай каля 300 квадратных метраў.