Парфорснае паляванне ў Паставах

Паставы на працягу свайго існавання былі невялічкім гарадком, мястэчкам, якое рэдка аказвалася ў гушчыні вялікіх падзей і здарэнняў. Таму жыццёвыя шляхі знакамітых асоб — людзей, што раскручвалі спіраль гісторыі, звычайна праходзілі далёка ад тутэйшых мясцін. Але былі часы, калі па пастаўскіх вуліцах шпацыравалі такія персоны, імёны якіх ведае або чуў калі-небудзь любы адукаваны чалавек. Вялікі князь, генерал, унук расійскага імператара Мікалая І Мікалай Мікалаевіч Раманаў; вядомы палкаводзец, расійскі, савецкі генерал-ад’ютант Аляксей Аляксеевіч Брусілаў; расійскі, савецкі ваенны дзеяч, дыпламат, пісьменнік генерал-лейтэнант Аляксей Аляксеевіч Ігнацьеў; белагвардзейскі казачы атаман, князь, палітычны дзеяч, пісьменнік Пётр Мікалаевіч Красноў; прэзідэнт і фельдмаршал Фінляндыі Карл Густаў Манергейм, адзін з першых расійскіх кінарэжысёраў і аператараў Аляксандр Дранкоў.