Бібліяпанарама

Усім зацікаўленым і апантаным бібліятэчнай справай мы прадстаўляем чарговы, чацвёрты выпуск “Бібліяпанарамы”. Нягледзячы на фінансавыя цяжкасці, мяркуем прапанаваць вам у наступным годзе “БП-5”, а калі пашанцуе, - і “БП-6”. Думкі і жаданне працаваць далей у гэтым напрамку ёсць, а таму з вашай дапамогай спадзяёмся зрабіць у будучым наша выданне яшчэ больш прывабным, цікавым і карысным. Даны нумар папоўніўся новымі рубрыкамі “Камп’ютэрны лікбез”, “Старонкі гісторыі”, а таксама крыху забытай – “Ліст у нумар”. Разам з імі мы змясцілі матэрыялы ў знаёмых і традыцыйных рубрыках: “Бюро інфармацыі”, “Майстар-клас”, “Шляхамі дальніх вандраванняў”, “Жаданы госць”, “Хто ёсць хто ў АБ?”, “Прыміце нашы віншаванні”. Уносіць разнастайнасць і змяшчае карысную інфармацыю аб адбыўшыхся ці будучых падзеях бібліятэчнага жыцця новая рубрыка “Дошка аб’яў”, якая размешчана па тэксту. Трошкі развесяліцца дапамогуць “Бібліяпрыколы”. У нашых планах – працягваць далей публікацыі матэрыялаў аб амерыканскіх уражаннях дырэктара абласной бібліятэкі Т.П.Муха, артыкулаў пра бібліятэчны дызайн мастацтвазнаўцы А.М.Дзенісевіча (пры згодзе аўтараў). Зноў жа чакаем вашых свежых ідэй, прапаноў, меркаванняў, водгукаў на тыя ці іншыя публікацыі.