Рух за Свабоду

Маці за сына. Актывісты Руху “За Свабоду” атрымалі суцэльныя адмовы на пададзеныя па ўсёй краіне заяўкі (больш за сотню) на правядзенне пікетаў, прысвечаных становішчу паплечніка Мікіты Ліхавіда, які адбывае пакаранне 3,5 года калоніі за падзеі 19 снежня 2010 года і трывае дадатковы ціск за кратамі. Больш за палову часу ў зняволенні 21-гадовы хлопец знаходзіўся ў штрафным ізалятары, бо называе сябе незаконна асуджаным і адмаўляецца выконваць правілы “зоны”. А цяпер яго наогул змясцілі ў памяшканне камернага тыпу. У Мінску пікеты не дазволілі нават на Бангалоры. Сярод іншых адмовы прыйшлі на два звароты ад імя старшыні Руху “За Свабоду” Аляксандра Мілінкевіча наконт пікетаў на Кастрычніцкай плошчы і ў Кіеўскім скверы.