Нашае жыцьцё

У нядзелю 19 чэрвеня на радзіме Васіля Быкава ў вёсцы Бычкі Ушацкага раёну Віцебскай вобласьці ў дзень народзінаў славутага пісьменьніка адбылося уручэньне прэміі “За Свабоду думкі”. На малой радзіме пісьменьніка сабраліся літаратары, мастакі, барды і проста прыхільнікі ягонай творчасьці. Да сядзібы-музэю, адбудаванай 4 гады таму паводле старой бацькоўскае хаты Васіля Быкава, зьехаліся людзі з усёй Беларусі. Бадай што самай пачэснай госьцяй была сястра пісьменьніка Валянціна Быкава, якая таксама жыве каля Вушачаў – у вёсцы Ваўчо. Дарэчы, менавіта спадарыня Валянціна давала парады, як расставіць мэблю ў музэйных пакоях, каб гэта было як пры жыцьці старэйшага брата, як раскласьці ягоныя асабістыя рэчы.