Свой лад

Беларусы – народ, які мае шматвекавую гісторыю сваёй дзяржаўнасьці. Яшчэ да ўтварэньня Вялікага Княства Літоўскага на этнічных беларускіх землях былі моцныя дзяржавы. Нашыя продкі бліскуча выявілі сябе як у культурных, духоўных, асьветніцкіх кірунках, вайсковай справе, так і ў галіне дзяржаўнага будаваньня. Цяжкой працай і крывавымі бітвамі даводзілася бараніць свае ідэалы. Беларусы хацелі быць вольнымі і плацілі за свабоду жыцьцём. Таму ў нас мноства славутых датаў, якія шануем і якія пацьвярджаюць старадаўнасьць нашай дзяржаўнасьці, а таксама нашую прагу да незалежнасьці. Але менавіта Дзень Волі, калі Рада Беларускай Народнай Рэспублікі, маючы ўсе паўнамоцтвы, выканала волю Ўсебеларускага зьезду і абвесьціла Беларусь незалежнай краінай, стаў сама вялікім і паважаным нацыянальным сьвятам.