Права на волю

Каб пазьбегнуць масавых рэпрэсіяў. Беларускія праваабаронцы абвясьцілі ў Бруселі пра кампанію па назіраньні за прэзідэнцкімі выбарамі. З 20 па 22 верасьня старшыня ПЦ "Вясна" Алесь Бяляцкі, яго намесьнік Валянцін Стэфановіч і старшыня "Беларускага Хельсінскага Камітэту" Алег Гулак знаходзіліся з візітам у Бруселі, дзе правялі шэраг сустрэчаў з прадстаўнікамі Еўрапейскага Саюзу. Адна з асноўных тэмаў, што абмяркоўвалася падчас гэтых сустрэчаў – незалежнае назіраньне і кампанія "Праваабаронцы за свабодныя выбары". Як паведаміў Алесь Бяляцкі, кампанія "Праваабаронцы за свабодныя выбары" прэзентавалася на высокім узроўні. Графік сустрэчаў быў вельмі насычаны. 20 верасьня каардынатары кампаніі сустракаліся з прадстаўніком Вярхоўнага камісара ЕС па пытаньнях правоў чалавека Рыінай Кіонка (Riina Kionka), пасьля – з прадстаўнікамі Еўрапейскай Камісіі, якія ад розных ведамстваў працуюць па пытаньні Беларусі. Таксама ў гэты дзень праваабаронцы правялі прэс- канферэнцыю для журналістаў з розных краінаў ЕС. 21 верасьня была сустрэча ў МЗС Бельгіі, 22 верасьня – з прадстаўнікамі нацыянальных дэлегацыяў у Еўрапарламенце, сярод якіх былі французы, фіны, датчане, палякі, вялікабрытанцы і інш.