Рэгіён (Бялынічы)

Леанід Злотнікаў прагназуе дэвальвацыю і інфляцыю. У будучым годзе беларусаў можа чакаць чарговая дэвальвацыя ды рост коштаў, заяўляе эканаміст Леанід Злотнікаў. Утрыманне курсу замежных валютаў у межах вызначанага валютнага калідора прыводзіць да таго, што Нацыянальны банк Беларусі вымушаны выкарыстоўваць золатавалютныя рэзервы для падтрымання стабільнасці беларускага рубля. Як зазначае Леанід Злотнікаў, ужо сёння попыт на замежную валюту перавышае прапанову на 300-400 мільёнаў долараў штомесяц: – Нацыянальнаму банку давялося гэта пакрываць з нейкіх рэзерваў. Гэта доўга працягвацца не можа, таму што прыток валюты стаў меншы. Яшчэ нейкім чынам можна стрымліваць рост інфляцыі, забяспечваць больш высокія заробкі за кошт валютных рэзерваў. Там праблема ў знешнім фінансаванні, якое змяншаецца. Таму верагоднасць не толькі дэвальвацыі, але і інфляцыі пасля новага года даволі высокая. Паводле стандартаў Міжнароднага валютнага фонду, золатавалютныя рэзервы Беларусі на 1 кастрычніка склалі амаль 6 мільярдаў долараў, у асноўным за кошт прытоку крэдытаў і выплаты "Газпрамам" апошняй траншы за "Белтрансгаз".