Покліч Волі

V з’езд беларусаў свету. Чарговы з’езд беларусаў свету, які скончыў сваю працу 19 ліпеня ў Менску стаў для ту­тэйшай улады і народу падзеяй куды менш значнай, чым “Славянскі базар” і злёт байкераў, якіх павіншаваў і нават праехаўся з імі на крутым матацыклеце галоўны байкер краіны. Усяго ў V з’ездзе беларусаў све­ту ўзялі ўдзел 252 дэлегаты з 18 краінаў. Не толькі з суседніх дзяржаваў, але і з ЗША, Канады, Брытаніі і нават з Новай Зеландыі! Найбольш было з Расіі — 44. Прыехалі знаныя ва ўсім свеце беларусы: айцец Надсан з Брытаніі, Юрка Станкевіч з Чэхіі, Янка Запруднік з ЗША... З’езд распачаўся мелодыяй са старадаўняга «Полацкага сшытку». Быў за­слуханы аўдыёзварот старшыні Рады БНР Івонкі Сурвілы. І ці не ўпершыню за ўвесь папярэдні час мерапрыемства наведаў міністр культуры( зараз гэтую пасаду займае беларускамоўны Павал Латушка). Разам з ім засвяціліся ўпаўнаважаны па справах рэлігій і нацыянальнасцей Леанід Гуляка і намеснік міністра эканомікі Андрэй Тур. Лукашэнка не прыслаў нават віншавальны ліст. Мяркую, досыць красамоўны факт.