Шчыра за гарбатай альбо з Рацыяй у гасьцях

За свой доўгі творчы шлях, які распачаўся публікацыяй на палосках беларускага штотыднёвіка „Ніва” ў 1956 годзе, В. Швед апублікаваў больш за 2500 вершаў. Пачэсны юбіляр і сёння не спыняе актыўную творчую працу. – Маёй асноўнай марай, – адзначыў В. Швед, – было заўжды паўстрымаць на Беласточчыне працэс асіміляцыі. Можа яшчэ крышку зраблю, але нямнога магу з увагі на свае гады – мне ўжо цяжка паехаць куды-небудзь на вёску, пагаварыць з людзьмі. Свой боль і пажаданьне магу яшчэ перадаць у сваіх вершах. В. Швед нарадзіўся ў 1925 годзе ў вёсцы Мора непадалёк Гайнаўкі, быў пастаянным карэспандэнтам штотыднёвіка „Ніва”, сузаснавальнікам Беларускага літаратурнага аб’яднання ў Польшчы „Белавежа” і па сённяшні дзень з’яўляецца яго сябрам.