Мой лён і сон

Пачынаем новую аўтарскую літаратурную перадачу. Яна цалкам будзе прысвечана творчасці і жыццёваму шляху беларускай легендарнай паэткі Ларысы Геніюш, чыё стагоддзе адзначаецца сёлета, 9 жніўня. З тае нагоды на леташнім з’ездзе беларусаў свету ў Мінску 2010 год быў абвешчаны Годам Ларысы Геніюш. Сённяшнюю перадачу пачнём голасам самой Ларысы Антонаўны. Летась быў выдадзены кампакт-дыск “Галасы”, які ўтрымлівае запісы галасоў беларускіх пісьменнікаў з далёкага 1968 года. Гэтыя запісы зрабіў на свой хатні магнітафон паэт Сяргей Панізнік. Ёсць на гэтым дыску і аўтарская дэкламацыя вершаў Ларысай Геніюш. Паслухаем верш “Яснай памяці маладосць…” (фота www.adradjency.narod.ru)