Тут і цяпер (Свабода)

Літоўскі карт-бланш. Еўропа ў адносінах да беларускага рэжыму адназначна вырашыла выбраць real politic, адсунуўшы назад правы чалавека. Учора прэзідэнт Беларусі Аляксандр Лукашэнка сустрэўся ў Вільнюсе з прэзідэнтам Літвы Даляй Грыбаўскайтэ. Апошні раз наш лідэр на такім высокім узроўні сустракаўся з кіраўніком суседняй Літвы ў лістападзе 1998 года — тагачасным прэзідэнтам Валдасам Адамкусам. А праз год пры больш чым загадкавых абставінах зніклі вядомы апазіцыянер Віктар Ганчар і вядомы прадпрымальнік Анатоль Красоўскі. Дарэчы, па дзіўным збегу акалічнасцей цяперашняя сустрэча Лукашэнкі з Грыбаўскайтэ праходзіла 16 верасня. Менавіта ў гэты дзень роўна дзесяць гадоў назад і зніклі Ганчар з Красоўскім. Пазней спецыяльны дакладчык Парламенцкай Асамблеі Савета Еўропы Хрыстас Пургірыдас у сваёй справаздачы назваў гэтыя падзеі выкраданнем, у якім былі замешаны высокапастаўленыя службовыя асобы Беларусі. Ён нават не выключыў, што да знікнення-выкрадання мог мець дачыненне і сам кіраўнік беларускай дзяржавы.