Тут і цяпер (Свабода)

Стомленыя ўраджаем. Мяркуючы па ўсім, Беларусь намалоціць збожжа амаль столькі ж, колькі і ў мінулым годзе, нягледзячы на праліўныя дажджы. Але ці будзе нам ад гэтага шчасце? Як сведчаць статыстычныя даныя, па стане на 19 жніўня беларускія гаспадаркі пераадолелі рубеж па намалоце збожжа ў 7 мільёнаў тон. Хоць на аналагічную дату ў 2008 годзе збожжа было сабрана 7,6 мільёна тон. Ёсць сур’ёзная надзея, што каравай-2009 атрымаецца неблагім. Тым больш сёлетняя ўраджайнасць перавышае мінулагоднюю і складае 38,5 цэнтнера з гектара. Напрыклад, яшчэ некалькі гадоў таму радаваліся ўраджайнасці і ў 29 цэнтнераў з гектара. Дык няўжо сельская гаспадарка пакрысе становіцца лакаматывам вываду краіны з крызісу?