Беларускі Гістарычны Агляд

Рэдакцыя Беларускага Гістарычнага Агляду прапануе чытачам першае асобнае выданне паказніка матэрыялаў, апублікаваных у часопісе з 1994 па 2005 г. (тамы І-ХІІ). У яго ўвайшлі тры папярэднія паказнікі, якімі былі ахоплены публікацыі часопіса да VІІІ тома ўключна, а таксама змест наступных чатырох тамоў. У адрозненне ад папярэдніх паказнікаў, якія апісвалі змест па алфавіту з захаваннем рубрык кожнага нумара, у гэтым выданні матэрыялы ўсіх дванаццаці тамоў БГА згрупаваны па някалькіх прынцыпах. У першым раздзеле яны падаюцца ў алфавітным парадку па прозвішчах аўтараў. Тут асобна выдзелены блок артыкулаў, куды ўключаны таксама паведамленні, публікацыі крыніц, пераклады і палеміка, блок рэцэнзій і аглядаў новай літаратуры (па прозвішчах рэцэнзэнтаў), а таксама комплекс дробных інфармацыйных нататак, у які ўвайшлі паведамленні пра канфэрэнцыі, экспедыцыі, абароненыя дысертацыі і г.д.