Газета Уладзіміра Кудзінава

Выбары ў Вярхоўны Савет рэспублікі ў нашым раёне адбыліся. Але не закончыліся. Заўтра адбудзецца другі тур галасавання па выбарах дэпутата ВС па Івацэвіцкай выбарчай акрузе №20. Як вядома, у гэтым туры за мандат дэпутата будуць змагацца два кандыдаты — дырэктар гандлёва-прамысловай фірмы “Івацэвічы” У. А. Кудзінаў і галоўны ўрач раёна І. М. Рыжко, за якіх у першым туры выбарчага марафону аддалі галасы адпаведна 43,9% і 21% выбаршчыкаў, якія прынялі ўдзел у галасаванні. Чытачы нашай газеты знаёмы з тымі штучна створанымі абставінамі, у якіх давялося ісці на выбары кандыдату ў дэпутаты ВС У. А. Кудзінаву. Пэўныя сілы распачалі супраць яго, як непажаданай ім асобы, нячыстую гульню, спрабавалі паралізаваць работу ўзначальваемай ім фірмы “Івацэвічы” і такім чынам скампраметаваць яго самога як кіраўніка, чалавека, кандыдата ў дэпутаты вышэйшага органа ўлады.