Ніва

Праваслаўная царква ў Польшчы святкаванні 2000-годдзя хрысціянства сумясціла са святам Праабражэння Гасподняга, якое адзначалася на Святой Гары Грабарцы 18 і 19 жніўня г.г. Па ініцыятыве мітрапаліта Варшаўскага і ўсяе Польшчы Савы 2000-гадовы юбілей быў спалучаны з атрыманнем копіі цудатворнай іконы Іверскай Божай Маці — дару манахаў са Святой Гары Афон для Польскай аўтакефальнай праваслаўнай царквы. Ікона Іверскай Божай Маці знаходзіцца ў Іверскім манастыры на Афоне. Паводле традыцыі, Божая Маці разам з апосталамі падалася прапаведаваць навуку свайго Сына ў Ібэрыю, якая разам з Калхідай складалі старажытную Грузію. Аднак, калі Багародзіца плыла ў госці да Лазара, на моры пачалася навальніца, якая лодку скіравала на Афонскі паўвостраў, дзе жылі паклоннікі бога Апалона. Там Багародзіца расказала пра свайго Сына і Ягоную навуку. Ахрысціла Яна новых хрысціян і пасля блаславенства сказала, што з гэтага месца будзе разыходзіцца па ўсім свеце вера і навука Сына Божага. (П. Шафран, З Афона на Грабарку, фрагмэнт)