Ніва

22 чэрвеня мінула 59 гадоў з дня, калі войскі гітлераўскай Нямеччыны заатакавалі Савецкі Саюз, адкрываючы найбольш крывавы фронт ІІ сусветнай вайны. Немцы, якія ад двух гадоў змагаліся ўжо за панаванне ў заходняй і сярэдняй Еўропе, вырашылі, у неспрыяльных для іх мілітарных умовах, падпарадкаваць сабе Савецкі Саюз, а прынамсі яго еўрапейскую частку. Гітлер меў тады адкрыты фронт на Захадзе і ў паўночнай Афрыцы. Аднак не давяраў ён свайму саюзніку, савецкаму дыктатару Іосіфу Сталіну, які ад дзесяці гадоў рыхтаваў гаспадарку краіны да мілітарнай канфрантацыі за пашырэнне камуністычнай імперыі. Гітлер распачаў вайну на Усходзе, каб не даць часу Сталіну на заканчэнне мадэрнізацыі Чырвонай Арміі. Сталін, ствараючы новае ваеннае грамадства, знішчыў усе зоны вольнадумства. Савецкія грамадзяне, так як нямецкія, дзяліліся на тых, якія загадваюць і на тых, якія выконваюць загады. Сталін удасканаліў прынцыпы вядзення ідэалагічнай вайны і спосабы фарміравання пажаданай уладамі свядомасці грамадства. Горш ішло яму з матэрыяльнай падрыхтоўкай да вайны. (Я. Мірановіч, Гітлер быў першы, фрагмэнт)