Свабода (Тут і цяпер)

5 чэрвеня стартавала супольная гістарычная вандроўка беларусаў і літоўцаў па Вяллі. Пачалася яна ад вытокаў ракі ў цэнтры Беларусі, а скончыцца ўжо ў ліпені ў Коўне, дзе Вялля ўпадае ў Нёман. 150 гадоў таму гэтым шляхам прайшоў вялікі аматар даўніны і краявідаў граф Канстанцін Тышкевіч, які напісаў па выніках падарожжа кнігу. Нашы сучаснікі таксама намераныя і кнігі напісаць, і выпусціць дакументальны фільм. Склад удзельнікаў увесь час мяняецца — нехта сыходзіць, нехта далучаецца. У сярэднім плыве больш за паўсотні чалавек. У такім складзе яны прайшлі дзяржаўную беларуска-літоўскую мяжу, дзе былі адмыслова абсталяваныя памежныя пасты.