Свабода (Тут і цяпер)

Пакуль міністэрства культуры Беларусі, а таксама “шырокая грамадскасць” вырашаюць, як ім сёлета адзначыць 125-годдзе Купалы і Коласа, студэнты Еўрапейскага гуманітарнага ўніверсітэта ў Вільні ўзялі ініцыятыву ў свае рукі. Днямі беларускія студэнты зладзілі інсцэніроўку знакамітага раздзела “Дзядзька ў Вільні” з паэмы Якуба Коласа “Новая зямля” — аднаго з найвыдатных літаратурных помнікаў 20-га стагоддзя. Тэатралізаванае дзейства прыцягвала ўвагу вулічных мінакоў і здымалася Літоўскай тэлевізіяй. Апранутыя ў пазычаныя на Літоўскай кінастудыі строі пачатку мінулага стагоддзя студэнты зрабілі на шляху ад вакзала да Замкавай гары шэсць прыпынкаў у месцах, дзе адбываецца дзея паэмы.