Belarus Live

Мінулы тыдзень у Беларусі прайшоў пад знакам актыўных кантактаў з прадстаўнікамі структураў аб’яднанай Эўропы. Пікам гэтага працэсу лічыцца даволі нечаканы прыезд у Менск Хаўера Саляны і ягоная сустрэча з Аляксандрам Лукашэнкам. Падобна, рэжым усё ж выходзіць са шматгадовай самаізаляцыі, і хутчэй за ўсё, з найменшымі згубамі і саступкамі Эўропе. Тым ня менш, для прыкладу, стала вядома, што ў дэлегацыі Парлямэнцкай асамблеі Рады Эўропы і МЗС Беларусі розныя погляды на тое, якім можа быць вяртаньне Беларусі ў ПАРЭ. Уключэньне апазыцыі ў склад дэлегацыі беларускага парлямэнту ў ПАРЭ зьяўляецца, паводле кіраўніка дэлегацыі ПАРЭ Г. Ліндблада, ключавым пытаньнем, што абмяркоўвалася падчас візыту ў Менск. «Мы знойдзем спосаб уключыць апазыцыю», – сказаў ён. Аднак, паводле словаў кіраўніка МЗС Беларусі Сяргея Мартынава, прадстаўляць Беларусь у ПАРЭ могуць толькі дэпутаты Нацыянальнага сходу.