Belarus Live

Афіцыйны візыт у Менск лібійскага кіраўніка Муамара Кадафі быў значным для яго беларускага калегі Лукашэнкі, які пакуль працягвае заставацца для Захаду непажаданым суразмоўцам. Нягледзячы на высілкі прапагандысцкай машыны Лукашэнкі, ніякіх сэнсацыяў камунікацыя кіраўнікоў Беларусі і Лібіі не прынесла. Разьвіцьцё стасункаў паміж дзьвюма краінамі будзе адбывацца і далей у асноўным у вайсковай і вайскова-тэхнічнай галінах: усяго толькі ў навучаньні лібійскіх курсантаў у беларускай Вайсковай акадэміі і рамонце савецкай вайсковай тэхнікі беларускімі адмыслоўцамі. Пра вельмі пажаданыя для беларускай эканомікі крэдыты, якія багаты лібійскі лідэр мог бы даць, гаворкі не вялося. Бадай што, найбольш важнымі для Беларусі падзеямі сталі дзьве нарады, якія Лукашэнка правёў у сваёй рабочай рэзыдэнцыі.