Belarus Live

На саміце АДКБ, што адбыўся 4–5 верасьня ў Маскве, краіны-ўдзельніцы арганізацыі асьцярожна падтрымалі дзеяньні Расеі на Каўказе і не прынялі рашэньня адносна прызнаньня незалежнасьці Абхазіі і Паўднёвай Асэтыі. Расея пагадзілася з гэтым асьцярожным меркаваньнем краінаў АДКБ, але не губляе надзеі дамагчыся прызнаньня вынікаў сваёй вайсковай апэрацыі на Каўказе хаця б ад некаторых краінаў былога СССР, перш за ўсё ад Беларусі. Ініцыятарам разгляду пытаньня пра статус Паўднёвай Асэтыі і Абхазіі на саміце АДКБ стаў Аляксандар Лукашэнка. Для беларускага прэзыдэнта гэта была ўдалая спроба перавесьці стрэлкі і адбіць псыхалягічную атаку Крамля, які патрабаваў ад Менску неадкладнага прызнаньня Абхазіі і Паўднёвай Асэтыі. У пытаньні ўхваленьня сваіх дзеяньняў на Каўказе і замацаваньня іх вынікаў у выглядзе прызнаньня незалежнасьці Абхазіі і Паўднёвай Асэтыі Расея сутыкнулася ня толькі з рэзкім процідзеяньнем ЗША і Эўропы, але і з пагрозай хуткага распаду постсавецкіх міждзяржаўных інстытуцыяў.