Belarus Live

Самай рэзанансавай падзеяй апошніх дзён у Беларусі стаў выбух самаробнага прыстасаваньня ў ноч на 4 ліпеня на гала-канцэрце ў гонар Дня незалежнасьці ў Менску. Параненыя каля паўсотні чалавек, некалькі зь іх дагэтуль у цяжкім стане. На канцэрце прысутнічаў прэзыдэнт Аляксандар Лукашэнка. Паводле афіцыйных крыніц, ён аказаўся ў радыюсе дасягальнасьці элемэнтаў самаробнай бомбы. Адмыслоўцы адзначаюць, што яе канструкцыя была разьлічана не на забойства, а на раненьні. На думку самога Лукашэнкі, выбух ня быў скіраваны асабіста супраць яго. Аналітыкі мяркуюць, што зламысьнікі найперш хацелі ўдарыць па рэпутацыі кіраўніцтва краіны, што дагэтуль эксплюатавала міф пра Беларусь як выспу стабільнасьці. На адмысловай нарадзе 7 ліпеня кіраўнік дзяржавы жорстка раскрытыкаваў кіраўніцтва сілавых структур за непрафэсійныя, на яго думку, дзеяньні ў зьвязку з выбухам.