Belarus Live

Двухдзённы афіцыйны візыт у Беларусь У. Пуціна мае на мэце падвесьці своеасаблівую рысу пад усім папярэднім (1991–2007 гг.) пэрыядам беларуска-расейскіх адносінаў. Менавіта так большасьць назіральнікаў схільныя ацэньваць значэньне знаходжаньня 13–14 сьнежня ў Менску расейскага прэзыдэнта. Варта адзначыць, што ў 2007 годзе гэта першая такога кшталту сустрэча прэзыдэнтаў Расеі і Беларусі і што беларуска-расейская інтэграцыя ў выглядзе Саюзнай дзяржавы зьяўляецца адным з тых нешматлікіх пытаньняў, якія прэзыдэнт Расеі пакуль ня змог давесьці да канца. Мабыць, стаміўшыся ад спробаў адгадаць сапраўдныя матывы й мэты цяперашняга візыту Пуціна ў Менск, як некаторыя расейскія, так і некаторыя беларускія аналітыкі лічаць, што ніякіх сэнсацыяў вынікі менскай сустрэчы не прынясуць. Пераконваюць, што гэта звычайны, плянавы візыт У. Пуціна.