Belarus Live

Зьяўленьне 3 кастрычніка ў сталіцы суседняй Летувы кіраўніка беларускага ўраду стала жаданай падзеяй для тых, хто вітае вяртаньне Беларусі ў сям’ю эўрапейскіх народаў. Афіцыйна візыт Сяргея Сідорскага быў зьвязаны з адкрыцьцём прамысловай выставы ў Вільні. Аднак кіраўнік ураду правёў сустрэчы ня толькі з прадстаўнікамі спраўных колаў Летувы, але і са сваім летувіскім калегам Гедымінасам Кіркіласам. На такім узроўні сустрэчы ў краінах Эўразьвязу ў беларускіх чыноўнікаў адбываюцца рэдка. Можна чакаць, што візыт Сідорскага ў Вільню надасьць імпульс у разьвіцьці супрацоўніцтва Беларусі і Летувы ў інвэстыцыйнай дзейнасьці, транспартнай і асабліва энэргетычнай галінах. Можна ўзгадаць, што ў мінулыя гады аналягічныя візыты Сідорскага ў Рыгу і Варшаву, дзе таксама адчыняліся беларускія выставы, былі сарваныя скандаламі, ініцыяванымі КДБ, калі высылаліся польскія і латыскія діпляматы.