Belarus Live

23 лістапада Аляксандар Лукашэнка правёў вялікую прэсавую канфэрэнцыю для ўкраінскіх журналістаў. Ён прапанаваў Кіеву шчыльную супрацу ў энэргетычных пытаньнях. І нават пайшоў далей, паразважаўшы аб пэрспэктывах стварэньня саюзнай дзяржавы з Украінай. Аналітыкі вылучылі як ключавую думку Лукашэнкі пра тое, што такі альянс прымусіў бы з сабой лічыцца. Маўляў, ягонае геапалітычнае месцазнаходжаньне ёсьць „горлам Расеі і Заходняй Эўропы". Незалежныя камэнтатары адзначылі таксама, што прэсавая канфэрэнцыя стала элемэнтам псыхалягічнага ціску на Крэмль у зьвязку з вострай двухбаковай спрэчкай у нафтагазавых пытаньнях. Чакалася, што пэўныя акцэнты ў ёй расставіць сустрэча беларускага і расейскага прэзыдэнтаў падчас саміту лідэраў СНД у Менску 28 лістапада (само мерапрыемства ў межах Садружнасьці незалежныя назіральнікі назвалі „пустым” і „правальным").