Дзедзіч

Stop 760! 21 студзеня ў Менску прайшла чарговая несанкцыянаваная акцыя пратэсту індывідуальных прадпрымальнікаў (ІП). Удзел у ёй, згодна з рознымі ацэнкамі, узялі ад 1,5 да 3 тысяч чалавек. Прадпрымальнікі пратэставалі супраць указа прэзідэнта № 760, згодна з якім з 1 студзеня 2008 года ІП пазбаўлены права наймаць работнікаў, за выключэннем блізкіх сваякоў. Спачатку на Кастрычніцкай плошчы прайшоў мітынг, на якім было заяўлена пра стварэнне грамадскага форуму “У абарону свабоды і прадпрымальніцтва”. Потым удзельнікі акцыі запатрабавалі сустрэчы з прэм’ер-міністрам Сяргеем Сідорскім і накіраваліся на плошчу Незалежнасці да Дома ўрада. Падчас шэсця дэманстранты выйшлі на праезную частку праспекта Незалежнасці, перакрыўшы рух транспарту. Каля Дома ўрада да прадпрымальнікаў выйшаў міністр унутраных спраў Беларусі Уладзімір Навумаў, які заклікаў мітынгоўцаў разысціся. Пасля гэтага міліцэйскі спецназ выціснуў удзельнікаў акцыі з плошчы.