Беларускі Сьвет

Каманду над ацалелымі паўстанцамі пераняў студэнт Маскоўскага ўнівэрсытэту Кароль Ясевіч, які паходзіў таксама з Ашмяншчыны. 40 чалавек з б. аддзелу Мінэйкі пад провадам А. Снадзкага (пісар Ашмянскага грашовага кіраўніцтва) далучыліся да аддзелу Густава Чаховіча («Астоя»). Дарэчы трэба сказаць, што Ф. Багушэвіч мог быць таксама ў аддзеле Чаховіча, бо гэты аддзел быў у ваколіцах Кушлянаў. Той-жа Снадзкі, будучы ўжо у аддзеле Чаховіча, быў захоплены ў палон пад Соламі (15 км. ад Кушлянаў) ды ў жніўні 1863 г. растраляны ў Ашмянах. Г. Чаховіч паходзіў з маёнтку Паўлінава суседняга Сьвянцянскага павету. Паводля прызнаньняў Снадзкага, у ягоным аддзеле было 200 паўстанцаў. Схопленыя паўстанцы на сьледзтве апавядалі ў сваіх прызнаньнях, што Снадзкі з выгляду быў хударлявым блёндынам гадоў 28, з вялікай барадой, бакенбардамі й вусамі. Калі Чаховіч часова пакідаў аддзел, то накладаў цёмныя акуляры, каб не пазналі яго царскія шпіёны.