Дзяцінства прыстань

Калі ў 1967 годзе паявіўся зборнік паэзіі Віктара Шведа „Жыццёвыя сцежкі” літаратурныя крытыкі менш ці больш прыхільна ацанілі творы мала яшчэ тады вядомага паэта, нягледзячы на тое, што яго вершы многа раней паяўляліся на старонках тыднёвіка „Ніва”. У кніжным выданні творы Віктара Шведа набралі аднак іншага выразу і вартасцей. Можна было іх лягчэй параўнаць і дайсці да нейкага канкрэтнага вываду. У гэтых адносінах аблягчыў ён заданне літаратурным крытыкам а таксама чытачам у краіне і за мяжой. Вядомы беларускі пісьменнік і літаратурны крытык Міхась Калачынскі ў сваім артыкуле „Сцежкамі жыцця” сцвердзіў, што вершы В. Шведа „...падкупаюць шчырасцю мастацкага ўвасаблення з’яў, з якімі аўтар сустракаўся на нялёгкім жыццёвым шляху...” І гэта, безумоўная трапная спасцярога. (З уступу)